Në Serbi sot do të mbahet një protestë 15-minutëshe me emrin “Serbi ndal / Zastani, Srbijo”, në nderim të 15 qytetarëve që humbën jetën nga shembja e mbulesës së Stacionit të Trenit në Novi Sad më 1 nëntor. Po ashtu, vazhdojnë bllokadat e fakulteteve, dhe opozita në Novi Sad ka njoftuar se do të mbajë aksionin “Serbi ndal / Zastani Srbijo” para Drejtorisë së Policisë, nga e cila ata u shpërndanë me forcë gjatë një aksioni të djeshëm.
Mbi 40 fakultete shtetërore janë zyrtarisht në bllokadë. Të gjithë fakultetet në Novi Sad janë në bllokadë. Studentët dje nderuan viktimat e tragjedisë me një bllokadë të rrugëve që zgjati 15 minuta dhe me daljen para fakultetit. Studentët u mblodhën edhe mbrëmjen e djeshme rreth orës 19:00 para RTS për të ndërprerë programin e lajmeve të shërbimit publik në orën 19:30, pasi ky shërbim nuk publikonte informacionet për aktivitetet e tyre dhe për të kundërshtuar akuzat që ata janë të paguar. Të gjithë plenumi i fakulteteve të Beogradit që janë në bllokadë thanë se kërkesat e tyre nuk janë plotësuar, duke aluduar në deklaratën e presidentit të Serbisë, Aleksandër Vučić, se ai ka përmbushur të gjitha kërkesat e studentëve dhe se ata tani mund të përfundojnë bllokadat. Po ashtu, janë në bllokadë disa shkolla të mesme dhe gjimnaze.
Qytetarët janë të ftuar që sot, në orën 11:52, të ndalojnë gjithçka që po bëjnë, qoftë duke udhëtuar në makinë, duke ecur në rrugë, duke qenë në vendin e punës, shkollë apo fakultet, dhe të nderojnë viktimat.
Në tragjedinë e ndodhur më 1 nëntor, kur u shemb mbulesa e Stacionit të Trenit në Novi Sad, humbën jetën 15 persona dhe dy të tjerë u plagosën rëndë.
